Finalmein eis ei aschi lunsch! En num dall‘ Uniun da Musica Sagogn savein nus presentar a Vus nossa musica giuvenila. 34 musicants giuvens ela vegliadetgna denter 10 e 15 onns formeschan oz nossa Musica giuvenila Aspermont Sagogn (MGAS)“, cun quels plaids ha in dil gronds iniziants dalla MGAS, Ignaz Lombris, presentau l‘ emprema gada 1994 la Musica giuvenila Aspermont Sagogn alla populaziun. La MGAS e l‘ Uniun da Musica Sagogn secapeschan sco in‘ uniun cun duas suprastonzas autonomas.

Oz – in deceni pli tard – secapescha la musica giuvenila Aspermont e l’unuin da musica Sagogn sco ina uniun denton cun duas indiviudualas suprastonzas. Nus essan loschs da nossa MGAS. Oz dumbra la Musica giuvenila Aspermont Sagogn 26 musicantas e musicants giuvens. Dirigenta ei Michaela Lombris, che motivescha dapi la fundaziun las giuvnas musicantas ed ils giuvens musicants mintg‘ onn puspei presentar in bi e variont concert. Era ei la collaboraziun cun la Uniun da Musica Sagogn adina vegnida pli gronda, aschia che biars sunan ella Musica giuvenila sco era ella Uniun da Musica.

Ins sa dir cun bien sentiment: La Musica giuvenila Aspermont Sagogn ha en quels diesch onns buca mo formau novs musicants per la Uniun da Musica Sagogn, mobein era da a biaras giuvnas ed a biars giuvens in‘ occupaziun duront il temps liber. Tier la fundaziun dalla Musica giuvenila Aspermont ha l’uniu da Musica Sagogn mess claras finamiras e persequitau quellas consequentamein entochen oz.

Primo: La MGAS less dar la pusseivladad da sescolar musicalmein a nos musicants giuvens, e quei schizun en nies agen vitg.

Secundo: En ina musica giuvenila emprendan il scolars e las scolaras gia baul da sunar ensemen e da cooperar en ina structura sozio-culturala.

Terzo: Els retscheivan aschia era ina buna basa sociala per lur futur. Igl intent ed il senn d‘ ina tala musica giuvenila ein da francar vinavon la cultura da musica instrumentala da nies vitg. Plinavon duei cheutras era il temps liber da nossa giuventetgna vegnir promovius!